Pegida anulon protestën në Bazel për shkaqe sigurie

Në protestë do të merrnin pjesë edhe Jean-Marie Le Pen, themelues i «Front National» francez, kryetarja e partisë kundër BE-së «Alternative für Deutschland» Frauke Petry etj.

Lëvizja «Pegida» (organizata e njohur gjermane që proteston kundër islamizimit të perëndimit) ose “dega” e saj në Zvicër kishte paralajmëruar një manifstim protestues për sot në Bazel. Por, manifestimi është anuluar, kanë deklaruar sot përgjegjësit e Pegida-s. Shkak për këtë anulim ka qenë «rreziku nga përshkallëzimi i situatës», shkruajnë sot mediet zvicerane.

Protesta e kësaj organizate ishte lejuar dhe pastaj ndaluar nga policia por kjo nuk u kishte bërë përshtypje organizatorëve fillimisht, transmeton albinfo.ch. Në një listë të paverifikuar rezultonte se në protestë do të merrnin pjesë edhe eksponentë të njohur të ekstremit të djathtë nga jashtë vendit, si Jean-Marie Le Pen, themelues i «Front National» francez, kryetarja e partisë kundër BE-së «Alternative für Deutschland» Frauke Petry etj.

Por ndërkohë të rinjtë e Partisë së Gjelbër dhe Juso kishin paralajmëruar një kundërdemonstratë. Për shkak të shqetësimeve të natyrës së sigurisë, policia ka tërhequr lejen që më parë ia kishte dhënë organizatorit javën e parafundit. Ajo në arsyetimin e saj kishte shkruar se «ka informacione për pjesëmarrjen e grupeve të dhunshme nga të dyja kampet, madje nga vendi dhe jashtë tij». Si rezulat, Pegida ka bërë sot anulimin.

Kryetari i saj Mike Spielmann ka shkruar në facebook: veç tjerash «Për ne ka qenë me shumë rëndësi që të tregojmë një sinjal të qartë kundër një politike të gabuar në vendin tonë. Por ne, në bazë të njoftimeve më të reja (implikimi i huliganëve dhe personave të dhunshëm) na u bë e qartë se ne nuk duam dhe as guxojmë të rrezikoojmë sigurinë e qytetarëve».