Dy familje rome kosovare, në ilegalitet, për t`i ikur kthimit në Kosovë

Të dy familjet me gjithsej 4 të rritur dhe 13 fëmije, jetonin në Gjermani prej 17 vitesh

Policia në Göttingen me një angazhim të madh të forcave të veta ka provuar sot të dëbojë dy familje rome kosovare, por më kot. Të dy familjet me gjithsej 4 të rritur dhe 13 fëmije, jetonin në Gjermani prej 17 vitesh, shkruan ndr.de. Me rastin e kontrollimit të bërë sot në mëngjes në ndërtesën ku banonin, policia nuk ka gjetur asnjërin prej tyre. Duket se ata, duke e ditur se po ndiqen për t`u dëbuar, janë hedhur në ilegalitet.

Gjykata e Lartë Administrative e Landit Niedersachsen e kishte hedhur poshtë javën e kaluar ankesën e familjeve kundër dëbimit, transmeton albinfo.ch. Dy familjet e përmendura prej disa vitesh kanë qenë me statusin «duldung» të dhënë nga qyteti Göttingen. Ata nuk janë në procedurë azili ndërsa dy kërkesa për lejen e qëndrimit të bëra komisionit për raste të rënda u janë hedhur poshtë.

Pas kalimit të afatit të «Duldung»-ut, gjykata e Göttingen-it në dhjetorin e vitit të kaluar kishte hedhur poshtë ankesën e familjeve kundër riatdhesimit. Gjyqtarët këtë vendim e kishin arsyetuar me mangësinë e përpjekjeve për integrim të familjeve të përmendura.

Për t`i siguruar familjes qëndrimin në Gjermani kanë treguar angazhim të madh organizata të ndryshme humanitare dhe parti gjermane, përcjell albinfo.ch. Ndërsa të premten me këtë rast është marrë edhe Asambleja e qytetit, me ç`rast tri parti: E gjerlbra, Partia e Piratëve dhe ajo e Majtë kanë kërkuar që familjeve t`u jepet edhe njëherë «duldung»-u.