Zviceranët japin 10.7 miliardë franga për shoping jashtë vendit

Mallrat që më së shumti blihen nga zviceranët në vendet fqinje janë artikujt ushqimorë. Për to janë dhënë gjatë vitit që shkoi 2.41 miliardë franga

Fenomeni i furnizimit me artikuj të ndryshëm jetësorë në vendet fqinje është i vjetër dhe në vazhdimësi në teh të kritikës. Por ai po bëhet edhe më i theksuar sidomos që nga viti i kaluar kur qe përmbysur kursi i frangut me euron. Kështu, gjatë vitit 2015 zviceranët kanë shpenzuar 10.7 miliardë franga në shopingun jashtë vendit, që është për 6 për qind më shumë se në vitin 2013 kur kursi i frangut me euron ishte 1.24.

Siç konstaton një stuidim i organizatës për hulumtimin e tregut GfK, mallrat që më së shumti blihen nga zviceranët në vendet fqinje janë artikujt ushqimorë. Për to janë dhënë gjatë vitit që shkoi 2.41 miliardë franga. Në vendin e dytë për nga shuma e shpenzuar e parave vijnë artikujt e veshmbathjes me 1.82 miliard franga.

Studimi ka konstatuar se 57 për qind e ekonomive familjare të Zvicrës blejnë së paku nga një herë në muaj artikuj të ndryshëm në vendet fqinje.