Deklarata e Thaçit, luftënxitëse e vëllavrasëse

“Njerëz qyqarë që u larguan me bisht nën shalë”, kështu iu është referuar zëvendëskryeministri Hashim Thaçi, pjesëtarëve të opozitës që morën pjesë në protestën e 17 shkurtit

Zëvendëskryeministri dhe njëherësh i nominuari i koalicionit për president të Kosovës, Hashim Thaçi ka fyer rëndë protestuesit opozitarë të mërkurën me 17 shkurt. Ai u ka kërkuar “mejdan” opozitarëve, ndërsa i kaq quajtur qyqarë që nuk patën guxim ta sulmojnë qeverisë si herën e kaluar.

“Njerëz qyqarë që u larguan me bisht ndër shalë”, kështu iu është referuar zëvendëskryeministri Thaçi, pjesëtarëve të opozitës dhe atyre që morën pjesë në protestë.

Mirëpo, edhe pse ditën e nesërme Thaçi zbuti llafet, duke iu kërkuar dialog opozitarëve e madje edhe i përshëndeti protestuesit që ishin të qetë, deklarata e tij nga analistët politikë shihet si luftënxitëse dhe vëllavrasëse.

Analisti Petrit Zogajt ka thënë se deklarata e Hashim Thaçit është ftesë për mejdan, raporton KTV.

Skandaloze dhe luftënxitëse këto deklarata të zëvendëskryeministrit Thaçi i quan edhe analisti Imer Mushkolaj. Ndërkaq, partitë opozitare e kanë quajtur fyese dhe ofenduese deklaratën e Hashim Thaçit, duke thënë se ky i fundit i ka fyer qytetarët që iu bashkuan protestës.

“Kishin dërguar mesazhe – na pritni sot në Prishtinë.  Na pritni në Qeveri kryeministër, Mustafa, zëvendëskryeministër, Thaçi. Ne ishim këtu, njëzet metra në distancë me ta. Nuk erdhën. I pritëm. Kësaj radhe kishim vendosur që të mos i presim me kafe, por t’ua japim përgjigjen e merituar. Dhe, si u larguan? Me bisht nën shalë, si qyqarë”, ka deklaruar të mërkurën Thaçi.

Kryetari i Lëvizjes “Vetëvendosje”, Visar Ymeri e ka krahasuar Thaçin me ish-ministri serb, Alekandar Jabllanoviq, kur pati ofenduar nënat gjakovare. “Hashim Thaçi dje e përdori të njëjtin term që e ka përdorur vija shoviniste e Serbisë ndaj shqiptarëve, sepse tha se shqiptarët kanë bisht dhe kështu i shndërroi shqiptarët në egërsira”, tha ai.

Kurse publicisti Halil Matoshi, ka vlerësuar se Thaçi nuk e di peshën që e ka posti që ai e mban, në të kundërtën “Thaçi nuk do të përdorte diskurs luftënxitës e vëllavrasës”, citon Zëri. “Deklarata e tij ka qenë luftënxitëse, madje luftënxitëse për vëllavrasje. Ky nuk është fjalor i një burrështeti, i një zëvendëskryeministri e i një ish-kryeministri për dy mandate dhe mbi të gjitha ky diskurs nuk i ka hije një pretenduesi për ta marrë postin e presidentit të vendit”, ka vlerësuar Matoshi.