Opozita barrikadohet në shesh: protestë ditë e natë

Opozita ka ndërtuar disa tenda në sheshin “Skënderbeu” në Prishtinë, ku do të qëndroj, siç kanë thënë ata, ditë e natë deri në rrëzimin e Qeverisë së Kosovës

Pas protestave në rrugë dhe rebelimit brenda Kuvendit, partitë opozitare në Kosovë kanë zgjedhë një mënyrë tjetër të protestimit. Përfaqësuesit e opozitës kanë ndërtuar disa tenda në sheshin “Skënderbeu” në Prishtinë, ku do të qëndrojnë, siç kanë thënë ata, “ditë e natë” deri në rrëzimin e Qeverisë së Kosovës.

Kjo mënyrë e protestimit, me grevë urie, është në kuadër të kundërshtimit të Qeverisë së Kosovës, për shkak të marrëveshjeve që kjo e fundit ka arritur me Serbinë dhe Malin e Zi. Protestimi me tenda, do të bëhet edhe në shenjë kundërshtimi pas paralajmërimit për zgjedhjen e Hashim Thaçit në postin e presidentit të Shtetit.

Ish- lideri i Lëvizjes Vetëvendosje gjate tubimit në shesh ka thënë Kosova ka nevojë për një qeveri demokratike, ndërsa sheshi siç tha ai, është i qytetareve dhe se nuk kanë nevojë për kërkim leje nga askush. Kurti po ashtu tha se do të qëndrojnë në shesh deri sa të largohet qeveria Mustafa-Thaçi.

“Në emër të subjekteve opozitare, në emër të njerëzve të vullnetit të mirë…, kërkojmë që sa më parë të largohet kjo qeveri në mënyrë që t’i hapet perspektiva qytetarit dhe gjendjes së qytetarit. Nga kjo qeveri nuk mund të presim gjëra të mira”, ka thënë Kurti.

Edhe Aleanca për Ardhmërinë e Kosovës përmes një komunikate ka thënë se protestat e opozitës së bashkuar do të jenë “ditë e natë” deri në dorëheqjen e Qeverisë.

“Opozita e bashkuar prej sot ka filluar një etapë të re të kundërshtimit të qeverisjes së keqe në vend. Protestat do të jenë ‘ditë e natë’ deri në dorëheqjen e kësaj Qeverie”, thuhet në komunikatë e AAK-së.

Këto protesta, sipas AAK-së, do të jenë paqësore dhe mesazhi më i fuqishëm për largimin e kësaj Qeverie antikushtetuese, është masoviteti dhe qëndrueshmëria, e cila do të rritet përditë dhe nga të gjitha anët e Kosovës. “Ftojmë të gjithë qytetarët, pa dallime politike, etnike, religjioze dhe kulturore, që t’i bashkohen zërit kundër kësaj Qeverie”, thuhet në njoftimin e AAK-së.