Zvicra vendos të mos i kthejë refugjatët në Hungari

Fjala është për ata azilkërkues të cilët në zonën e Shengenit kanë hyrë përmes Hungarisë, dhe të cilëve u është hedhur poshtë kërkesa për azil nga autoritetet zvicerane

Gjykata Administrative Federale deri në një vendim tjetër nuk do të kthejë mbrapsht azilkërkuesit nga Zvicra në Hungari. Një vendim të tillë e kanë marrë njëzëri 28 gjyqtarë të të dy seksioneve të azilit në këtë gjykatë, njofton përgjegjësi për komunikim i kësaj gjykate, duke vërtetuar kështu një raportim të gazetës NZZ.

Fjala është gjithnjë për ata azilkërkues të cilët në zonën e Shengenit kanë hyrë përmes Hungarisë, dhe të cilëve u është hedhur poshtë kërkesa për azil, bërë Sekretariatit Shtetëror për Migracion. Në këtë mënyrë, ata e fitojnë të drejtën e qëndrimit të përkohshëm në Zvicër.

Siç dihet, Hungaria vitin e kaluar kishte ngritur përgjatë kufirit të saj me Serbinë dhe Kroacinë një gardh qindra kilometrash për të penguar hyrjen e refugjatëve. Po ashtu ajo dënon me burg deri në pesë vjet kalimin ilegal të kufirit.