Lirohet qarkullimi në rrugën Prishtinë-Shkup

Njëra korsi e magjistrales Prishtinë-Shkup është liruar për qarkullim. Rruga ishte bllokuar tek muri mbrojtës ku edhe më parë kishte shembje dheu

Pesë ditë pas u bllokua rruga Nacionale N2, Prishtinë-Shkup në Grykë të Kaçanikut, si pasojë e shembjes së dheut dhe gurëve, njëra korsi është liruar sot për qarkullim. Kështu njofton Ministra e Infrastrukturës në Prishtinë. Rruga ishte bllokuar tek muri mbrojtës ku edhe më parë kishte shembje dheu.

“Mirëpo, tani, me përkujdesje të kompanisë së mirëmbajtjes, që i ka vendosur shenjat e sinjalizimit dhe ka siguruar pjesën e rrugës ku ka ndodhur rrëshqitja, është liruar për qarkullim njëra korsi e kësaj rruge”, thuhet në njoftimin e Ministrisë.

Magjistralja Prishtinë-Shkup është bllokuar të premten, ndërsa deri sot, qytetarët kanë  shfrytëzuar pikëkalimin Glloboçicë-Jazhincë, nëpër malet e Sharrit për të shkuar në Maqedoni dhe anasjelltas për të ardhur në Kosovës. Në vendin ku janë shkaktuar shembjet e dheut, edhe më parë ka pasur probleme të njëjta. Disa vite më parë, për javë të tëra rruga ka qenë e bllokuar.