Murati njofton diasporën në Suedi për mësimin shqip

Ministri Murati tha në Suedi se përmirësimi i gjendjes në aspektin e mësimit shqip në diasporë, regjistrimi i bashkatdhetarëve dhe tërheqja e investimeve janë prioritet të Ministrisë

Ministri kosovar i Diasporës, Valon Murati po qëndron në Suedi për t’i njoftuar bashkatdhetarët në Skandinavi lidhur me projektin e përbashkët me Qeverinë e Shqipërisë për mësimin e gjuhës shqipe në diasporë. Ai takoi bashkëkombësit atje dh i njoftoi për të gjitha zhvillimet në Kosovë.

Sipas njp njoftimi lëshuar nga Ministra e Diasporës, ministri Murati në Malmo u takua me bashkatdhetarët dhe përfaqësuesit e shoqatave të ndryshme në këtë shtet.

“Fokusi i angazhimit tonë është përmirësimi i gjendjes në aspektin e mësimit shqip në diasporë, regjistrimi i bashkatdhetarëve tanë dhe tërheqja e investimeve nga diaspora”, u shpreh ministri Murati, i cili i njoftoi të pranishmit edhe për marrëveshjen me Republikën e Shqipërisë lidhur me krijimin e mundësive për bërjen e praktikës në institucionet e këtyre dy shteteve nga studentët e diasporës.

Me këtë rast,  i ftoi ata të aplikojnë brenda afatit të paraparë. Gjithashtu, i njoftoi prindërit për organizimin e kampeve në Kosovë për të  rinjtë nga diaspora.

Të pranishmit e falënderuan ministrin për vizitën dhe, njëkohësisht, shprehën shqetësimet e tyre sidomos rreth çështjes së sigurimeve kufitare. Ditë më parë Ministri Muarti tha se do të angazhohet që sivjet bashkatdhetarët këto sigurime t’i paguajnë online dhe mos të presin në kufij.