Kontingjenti ushtarak i Luksemburgut tërhiqet nga Kosova

Ushtria e Luksemburgut është e angazhuar në kuadër të Forcës së Kosovës (KFOR) që nga viti 2000 dhe aktualisht ka 23 ushtarakë në detyrë

Foto Arkiv

Shteti i Luksemburgut ka vendosur që ta tërheq nga Kosova kontingjentin e saj ushtarak që funksionin tash e 16 vjet në kuadër të misionit paqeruajtës (KFOR). Këtë lajm e ka konfirmuar vet ministri i Mbrojtjes i këtij shteti, Etienne Schneider, raporton Luxemburger Wort.

Ai ka thënë se pjesëmarrja ushtarake e Luksemburgut si pjesë e misionit të NATO-s në Kosovë do të përfundojë në vitin 2017.

Ushtria e Luksemburgut është e angazhuar në kuadër të Forcës së Kosovës (KFOR) që nga viti 2000, një vit pasi NATO nisi misionin e vet në rajon, dhe aktualisht ka 23 ushtarakë në detyrë në Kosovë, transmeton Express.

Schneider ka thënë gjatë një mbledhjeje të komisionit parlamentar për punë të jashtme dhe mbrojtje se “që nga fillimi i misionit, kontributi ynë dhe prania jonë ushtarake është vlerësuar vazhdimisht nga autoritetet lokale”. “Situata në Kosovë është përmirësuar ndjeshëm në vitet e fundit”, ka deklaruar Schneider, i cili ka shtuar se “ekzistojnë ende disa sfida që duhet të kapërcehen”, raporton Albinfo.Ch.

Forcat paqeruajtëse të NATO-s janë vendosur në Kosovë në qershor të vitit 1999, si struktura e quajtur KFOR për të vendosë paqen pas një lufte 16 muajshe. Fillimisht KFOR-i kishte mbi 50 mijë ushtarë, që gradualisht me stabilitetin e vendit u reduktuan në afër 5 mijë sosh.