BE ndanë çmimin “Evropiani i vitit” në Kosovë

Të premten për herë të parë, Zyra e BE-së ndanë çmimin “Evropiani i vitit” në Kosovë, ku të nominuar janë tri femra, një institucion dhe një OJQ

Si pjesë e festimeve me rastin e Ditës së Evropës 2016, të premten në Prishtinë, Zyra e Bashkimit Evropian do të prezantojë për herë të parë çmimin “Evropiani i vitit”, për të falënderuar një individ apo institucion për promovimin e idesë evropiane në Kosovë. Në mesin e të nominuarëve janë tri femra, një institucion dhe një organizatë joqeveritare.

Ky shpërblim do të prezantohet më 13 maj, nga Samuel Zhbogar, shefi i Zyrës së BE-së në Kosovë dhe njëherësh përfaqësuesi Special i BE-së, dhe Bekim Çollaku, ministër i Integrimeve Evropiane në Kosovë.

Të nominuarit për shpërblimin “Evropiani i parë i vitit” janë: Majlinda Kelmendi, Kampionia evropiane e xhudos; Institucioni i Avokatit të Popullit të Kosovës; Danijela Zubac, anëtare e Bordit të Fondit Zhvillimor; iniciativa “Let’s do it Kosova – Ta pastrojmë Kosovën”; Grupi për Studime Juridike dhe Politike; dhe Krenare Gashi, Shefja e Rrjetit të Qendrave Rinore të Kosovës.

“Kjo ceremoni do të ndiqet nga një prezantim i publikimit “MSA-ja për secilin”, i cili paraqet pikat kryesore të Marrëveshjes së Stabilizim Asociimit (MSA) në një mënyrë të kuptueshme për të gjithë”, thuhet në një njoftim lëshuar nga Zyra e Bashkimit Evropian bë Kosovë.

MSA-ja në mes të Bashkimit Evropian dhe Kosovës ka hyrë në fuqi më 1 prill 2016. Kjo Marrëveshje është kontrata e parë gjithëpërfshirëse në mes të BE-së dhe Kosovës dhe është një e arritur në marrëdhëniet në mes të Kosovës dhe BE-së.