Franca dhe Belgjika, kundër heqjes së shpejtë të vizave për Kosovën!

"Nuk mund të marrim në konsideratë heqjen e vizave për Ukrainën, Gjeorgjinë dhe Kosovën në javët apo muajt e ardhshëm. Franca nuk dëshiron”, ka thënë Cazeneuve të premten më 20 maj

Foto Ilustrim

Heqja e detyrimit për viza po vihet në pikëpyetje. Bashkimi Evropian nuk do t’i heq vizat për Kosovën, Ukrainën e Gjeorgjinë në muajt e ardhshëm. BE aktualisht është në kërkim të aktivizimit të një mekanizimi i cili do të mundësonte suspendimin e shpejtë të heqjes së vizave për vende të caktuara nëse konstatohet keqpërdorimi i regjimit. Dhe vetëm atëherë kur ky mekanizëm të aprovohet, Brukseli do të vazhdojë diskutimet për liberalizim vizash për këto vende.

Kjo është raportuar nga ministri i Brendshëm i Francës, Bernard Cazeneuve, sipas BBC-së.

“Nuk mund të marrim në konsideratë heqjen e vizave për Ukrainën, Gjeorgjinë dhe Kosovën në javët apo muajt e ardhshëm. Franca nuk dëshiron”, ka thënë Cazeneuve të premten më 20 maj, transmeton Koha.net.

Kjo deklaratë doli gjatë samitit të Këshillit të Europës, ku Ministrat Europianë diskutuan liberalizimin e vizave me Turqinë. Sipas BBC-së, komenti i Cazeneuvet është përkrahur nga zyrtarët tjerë.

“Duke pasur parasysh krizën aktuale me migrantë, kriza më e madhe që nga Lufta e 2-të Botërore, liberalizimi i vizave [për Ukrainën, Gjeorgjinë dhe Kosovën] nuk do të jetë ideja më e mirë. Koha luan rol shumë të rëndësishëm në politikë”, ka thënë ministri belg për Imigrim, Theo Francken.

Njësoj, rezerva për heqjen e detyrimit të vizave për qytetarët e vendeve të përmendura ka shprehur edhe Belgjika, njoftojnë sot mediat në Prishtinë.