Pagat e shefave të ndërmarrjeve publike, jo më të mëdha se 500 mijë franga

Një mocion nga SP/PS kërkon që menaxherët e postës, Swisscom-it dhe SBB/CFF të mos mund të paguhen më shumë se 500 mijë franga në vit

Iniciativa mbi shërbimin publik është hedhur poshtë të dielën nga vota e popullit. Ajo, veç tjerash kërkonte që shefat e ndërmarrjeve publike të barazoheshin në të ardhurat e tyre me shërbyesit tjerë të administratës në nivel federal.

Por, edhe pas dështimit të iniciativës, Partia Socialdemokrate po kërkon që të ardhurat e shefave në fjalë të kenë një kufi të epërm prej 500 mijë frangash në vit. Këtë e ka kërkuar me një mocion parlamentar deputeti nacional nga partia e përmendur dhe sindikalisti i njohur Corrado Pardini. Ai ka kërkuar që menaxherët e postës, Swisscom-it dhe SBB/CFF të mos mund të paguhen më shumë se 500 mijë franga në vit, njofton srf.ch.

Shefi i grupit parlamentar të SP/PS; Roger Nordmann është ndërkaq i sigurt se ky mocion do të ketë mbështetje edhe jashtë kampit të majtë, transmeton albinfo.ch. “Ka edhe në spektrin e qendrës politikanë që mendojnë se shefi i SBB-së nuk duhet të ketë patjetër rrogën vjetore 1 milion franga ose shefi i Swisscom-it, dy milionë”, ka thënë ai.

Këtë qëndrim e konfirmon në një mënyrë edhe kryetari i CVP/PDC-së, Gerhard Pfister. Ai thotë se duhet të ketë një dallim në mes të pagesës që u bëhet menaxherëve të ndërmarrjeve publike dhe atyre të kompanive private.

Por në vetë ndërmarrjet e apostrofuara nuk pajtohen me përmbajtjen e këtij mocioni. Kryetari i këshillit menaxherial të SBB-së, Ulrich Gygi ka thënë se është kundër aktivizmit politik, përcjell albinfo.ch. Nevojitet një analizë më e thelluar  dhe në fund do të jetë Këshilli Federal që do të vendosë rreth kësaj.