Fillon në mënyrë spektakolare

Pas kësaj fitore, Franca ka tre pikë ndërsa Rumania mbetet pa pikë në grupin A, ku gjenden Shqipëria dhe Zvicra, të cilat do të takohen nesër me fillim në ora 15:00

Kampionati Evropian ka filluar zyrtarisht në Francë me një ceremoni madhështore, derisa më pas është zhvilluar takimi i parë ndërmjet Francës dhe Rumanisë, ku vendësit shënuan fitore 2:1, shkruan albinfo.ch.

Koreografia në stadium ishte mahnitëse, e cila sikur është një sinjal se sivjet do të kemi njërin nga kampionatet më spektakolare të viteve të fundit. Më pas kanë performuar disa këngëtarë, në mesin e tyre edhe David Guetta, si dhe një numër i madh i vullnetarëve.

Takimi ndërmjet Francës dhe Rumanisë ishte mjaft interesant, ku pjesa e parë u mbyll pa gola. Golin e parë për Francën e realizoi Olivier Giroud në minutën e 57-të, që ishte goli i parë në këtë Evropian. Por, rumunët nuk u dorëzuan dhe barazuan rezultatin. Stancu realizoi nga pika e bardhë. Megjithatë, Dimitri Payet në minutën e 89-të, shënoi një gol spektakolar dhe i dhuroi Kombëtares së tij tre pikë.

Pas kësaj fitore, Franca ka tre pikë ndërsa Rumania mbetet pa pikë në grupin A, ku gjenden Shqipëria dhe Zvicra, të cilat do të takohen nesër me fillim në ora 15:00.