Cyrihu vendos kontroll sigurie për të gjithë banorët e rinj

Poqese parlamenti e voton ndryshimin e ligjit për policinë edhe në leximin e dytë, policia në të ardhmen ka të drejtë t`i verifikojë të gjithë të posaardhurit, edhe nëse nuk ka ndonjë dyshim konkret ndaj tyre

Cyrihu ka vendosur për ashpërsim të qasjes ndaj atyre që vijnë për të banuar në këtë kanton, nga jashtë vendit apo nga kantonet tjera. Kështu, cilido që e bën Kantonin e Cyrihut vendbanim të përhershëm duhet të kalojë nën kontrollin e policisë e cila do të verifikojë nëse ai ka kryer vepra penale apo nëse ndaj tij është duke u zhvilluar ndonjë ndjekje, bën të ditur srf.ch.

Vendimin për këtë trajtim të ashpërsuar të banorëve të rinj e ka miratuar sot Parlamenti i Kantonit në leximin e parë. Ndërsa poqese parlamenti e voton ndryshimin e ligjit për policinë edhe në leximin e dytë, policia në të ardhmen ka të drejtë t`i verifikojë të gjithë të posaardhurit, edhe nëse nuk ka ndonjë dyshim konkret ndaj tyre.

Përfaqësuesit e partive të majta në këtë parlament kanë tërhequr vërejtjen se është e papërshtatshme që të bëhet kontrollimi në rrethanat kur brenda vitit në kanton vijnë rreth 100 mijë banorë të rinj, transmeton albinfo.ch.  Nga ana tjetër, partitë e djathta kanë theksuar se verifikimi i rasteve të ndjekjes penale të të porsaardhurve ka më shumë peshë se sa liria personale e qytetarëve.