“Myslimani kokëfortë” mund të dëbohet nga Zvicra

Emir Tahirovic sot do të përballet në gjykatë me akuzat se nuk i lejon vajzat e veta të marrin pjesë në orët e notit, pastaj djalit ia ka ndaluar të marrë pjesë në grupin e këndimit në shkollë etj

Emri i boshnjakut Emir Tahirovic nga St. Margrethen (kantoni St. Gallen) është i njohur në gjithë Zvicrën. Ai, i quajtur edhe si myslimani kokëfortë, para disa vitesh kishte bërë bujë pasi që kishte ngulur këmbë që vajzat e tij të shkonin në shkollë me shaminë mysloimane., thuhet në një insert të televizionit srf.

Rasti i tij qe bërë temë e dorës së parë për mediat sidomos pasi që Gjykata Federale i pati dhënë të drejtë atij dhe kishte detyruar shkollën që vajzat e tij të lejoheshin të vijonin shkollimin me mbukesën myslimane.

Tash sërish mbiemri Tahirovic ka zënë vend në faqet dhe ekranet e mediave zvicerane, transmeton albinfo.ch.  Të mërkurën (sot) ai do të përballet në gjykatë me akuzat se nuk i lejon vajzat e veta të marrin pjesë në orët e notit, pastaj djalit ia ka ndaluar të marrë pjesë në grupin e këndimit në shkollë dhe së fundi njërën nga vajzat nuk e ka lejuar të shkojë në kampim së bashku me shoqet dhe shokët e shkollës.

Po ashtu Tahirovic ka rënë në sy me postimet e tij me përmbajtje fundamentaliste në internet.

Për të gjitha këto, boshnjaku i cili bashkë me familjen jeton nga ndihmat sociale, mund të dënohet me katër muaj burg ose me gjobë.

Por, Tahirovic mund edhe të dëbohet nga Zvicra, përcjell albinfo.ch. Në aktakuzë shkruan se pas dënimit të plotfuqishëm me të do të merret Zyra për Migracion, e cila do të rishqyrtojë lejen e tij të qëndrimit në Zvicër.

SVP-ja e komunës ku jeton Tahirovic ashtu si dhe kryetari i komunës do ta përshëndesnin dëbimin e tij