Asnjë kosovar nuk është prekur nga sulmi terrorist në Stamboll

Ministra kosovare e Punëve të Jashtme njofton qytetarët se deri tani asnjë shtetas kosovar nuk është prekur nga sulmi terrorist në Aeroportin “Ataturk” në Stamboll

Në bazë të informatave zyrtare, të pranuara nga Ambasada e Kosovës në Ankara dhe Konsullata në Stamboll, deri më tash asnjë shtetas i Kosovës nuk është prekur nga sulmi i mbrëmshëm në Aeroportin Ndërkombëtar “Ataturk” në Stamboll. Kështu njofton Ministria e Punëve të Jashtme e Republikës së Kosovës nëpërmjet një kumtese për media.

“MPJ po vazhdon të përcjellë me shqetësim zhvillimet në Turqi pas sulmit tragjik që ua mori jetën dhjetëra qytetarëve dhe që plagosi shumë të tjerë. Në këto momente tragjike, Ministra e Punëve të Jashtme solidarizohet me shtetin turk dhe popullin e tij dhe do të përkrahë institucionet e atjeshme”, thuhet në njoftim.

Ndërkohë për shtetasit e Kosovës që mund të ndodhen në Turqi, apo familjarët e tyre, Ministra e Punëve të Jashtme ka vënë në dispozicion numrin e telefonit +905309548870 në të cilin mund të thërrasin për të adresuar çfarëdo pyetje në rast nevoje.

“MPJ së bashku me shërbimin e saj diplomatik është në shërbim të të gjithë qytetarëve të Republikës së Kosovës”, thuhet në njoftim, transmeton Albinfo.Ch.