Holandezja kundërshton kambanat e lopëve zvicerane por e do pasaportën e Zvicrës

Arsyetimet që asambleja ka dhënë kundër natyralizimit, sipas ekzekutivit të kantonit, nuk flasin për mungesë integrimi të zonjës me prejardhje holandeze

Nancy Holten është një shtetase holandeze e cila është bërë e njohur me kundërshtimin e saj për kambanat tradicionale të lopëve zvicerane dhe për zhurmën e kambanave të kishave të këtushme në mëngjes. Por ajo e donte pasaportën zvicerane dhe për këtë kishte bërë kërkesën në bazë të ligjit. Ndërkaq, qëndrimi i saj kritik ndaj vlerave dhe zakoneve të këtushme, i ka kushtuar Nancy-t me refuzim të shtetësisë.

Asambleja Komunale e Gipf-Oberfrick-ut (Kantoni Aargau) me 144 vota kundër dhe vetëm 48 pro, ka hedhur poshtë kërkesën për shtetësi zvicerane të gruas e cila në Zvicër jeton që nga viti 1983, transmetoin albinfo.ch mediat zvicerane. Por zonja Holten nuk është zmbrapsur. Ajo ka bërë ankesë në ekzekutivin e kantonit, i cili i ka dhënë të drejtë.

Në të vërtetë ekzekutivi me vendimin e tij detyron asamblenë komunale të votojë sërish për të njëjtën gjë, natyralizimin e holandezes.

Arsyetimet që asambleja ka dhënë kundër natyralizimit, sipas ekzekutivit të kantonit, nuk flasin për mungesë integrimi të zonjës me prejardhje holandeze. Ajo është bërë e njohur po ashtu edhe për angazhimin e saj kundër konsumimit të mishit (jeton si vegane), kundër mbajtjes së kafshëve për shfrytëzim në punë dhe në cirqe etj.

Të gjitha këto shprehin më shumë një qëndrim personal mbi temat e përmendura, thotë ekzekutivi në përgjigjen e tij, përcjell albinfo.ch Ndryshe, shtetasja holandeze i përmbush të gjitha kushtet për të fituar pasaportën zvicerane.

Edhe këshilli komunal, pas rishikimit në detaje të kërkesës, i ka dhënë mbështetje asaj. Ndërsa ekzekutivi nuk dëshiron të marrë vendimin krye më vete por ia kalon çështjen komunës Gipf-Oberfrick.