Krijohet Rrjeti komunal për Diasporë

Ministria e Diasporës beson se përmes krijimit të mekanizmave të tillë do të rritet efektiviteti i punës së institucioneve në raport me Diasporën

Para se të filloj ardhja e bashkatdhetarëve në Kosovë për pushimet e verës, Ministra e Diasporës ka zhvilluar një punëtori me zyrtarët ndërlidhës të komunave kosovare, për t’i bashkërenduar veprimet për akomodimi e bashkatdhetarëve, kryesisht në kohën kur fillon fushata “Ti je pjesë e atdheut” gjatë “Ditëve të diasporës”.

Kjo punëtori që u mbajt në objektin e Ministrisë së Diasporës u organizua në bashkëpunim me programin DEED të UNDP-së dhe IOM-in.

“Qëllimi i kësaj punëtorie ishte qasja e përgjithshme ndaj diasporës, gjetja e mënyrave të komunikimit dhe raportimit mes komunave dhe MeD-së, koordinimi i aktiviteteve për diasporën, qasja ndaj kulturës dhe arsimit në diasporë, strategjia e diasporës dhe bashkëpunimi me donatorët, regjistri i diasporës dhe rëndësia e tij, fuqizimi i lidhjeve me diasporën, si dhe tërheqja e investimeve”, thuhet në njoftimin e MeD-it.

Sipas tyre, me krijimin e këtij rrjeti të zyrtarëve ndërlidhës komunalë për Diasporën, po përmbushet edhe një tjetër segment i rëndësishëm i Strategjisë për Diasporën.

”Ministria e Diasporës beson se përmes krijimit të mekanizmave të tillë do të rritet efektiviteti i punës së institucioneve në raport me Diasporën”, thuhet në njoftim. Po ashtu, në këtë punëtori u diskutua se si aktivitetet e organizuara nga komunat të shfrytëzohen edhe për promovimin e rëndësisë së mësimit shqip në diasporë, regjistrimin, por edhe për tërheqjen e investimeve.