Ndërron jetë fëmija 4 vjeçar i goditur qëllimisht me makinë

Ka ndërruar jetë fëmija 4 vjeçar Almir Aliu nga Kumanova, i cili ditë më parë u godit qëllimisht nga B.I, pas një zënke afër Spitalit të Kumanovës

Ngjarja e rëndë ka ndodhur të shtunën e kaluar, kur një maqedonas i tërbuar me vëllain e tij dhe një pasagjer ka goditur me makinë Sedat Aliun nga Kumanova (1980), bashkëshorten e tij (M.K) dhe fëmijën 4 vjecar, i cili ndërroi jetë dje.

Incidentit i ka paraprirë një zënka lidhur me radhën e pritjes përpara Shtëpisë së Shëndetit – Kumanovë. Në këtë zënkë është përfshirë i dyshuari Iliç dhe 3 persona të tjerë shqiptarë, të cilët sipas versionit zyrtar të policisë, kanë përdorur edhe dhunë ndaj Iliçit, transmeton portali shenja.

Pasi i ka ikur sulmit, Iliç me veturën e tij të tipit “Mercedes” ka tentuar të shkelë viktimën Sedat Aliu, bashkëshorten e tij dhe fëmijën 4 vjeçar. Të tre kanë përfunduar të lënduar, ndërsa më rëndë fëmija i tyre.

Pasditen e djeshme, Almiri 4 vjeçar nuk mundi t’u mbijetojë plagëve të marra dhe ndërroi jetë në Klinikën e Shkupit.

Pas rastit, gjykata i caktoi 30 ditë paraburgim maqedonasit të tërbuar, ndërsa kryeshefi i policisë së Kumanovës dhe deputeti i BDI-së nga kjo zonë, Rexhail Ismaili bën thirrje për qetësi dhe t’i lihet ligjit dhe organeve të rendit të merren me rastin.