Policia me personel shtesë për pritjen e bashkatdhetarëve

Ministra e Diasporës dhe Policia e Kosovës i koordinojnë aktivitetet për pritjen e bashkatdhetarëve gjatë pushimeve të verës

Policia e Kosovës e ka garantuar Ministrinë e Diasporës, se gjatë muajve të verës do të jetë më e angazhuar për t’u gjetur më afër bashkatdhetarëve. Gjatë një takimi që kanë zhvilluar ministri Valon Murati dhe drejtori i përgjithshëm i Policisë së Kosovës, Shpend Maxhuni, u bisedua rreth masave të sigurisë në komunikacion dhe në pikat kufitare, me qëllim të ngritjes së nivelit të sigurisë në trafik dhe sensibilizimit të bashkatdhetarëve, të cilët vijnë për pushime në atdhe.

Në këtë takim u bisedua edhe rreth zgjidhjes së uzurpimit të pronave, zgjidhje kjo që do të kishte efekt pozitiv sidomos për investitorët shqiptarë nga diaspora, të cilët janë përballur me probleme të pronave.

Meqenëse në këtë kohë fillojnë edhe aktivitetet e ndryshme të MeD-së për diasporën, ministri Murati kërkoi nga Policia e Kosovës që, sipas nevojës, të jetë e pranishme aty ku ka organizime të tilla, si dhe në pikat kufitare të shpërndahen broshura informative, të cilat i ka përgatitur Ministria e Diasporës bashkë me institucionet e tjera relevante, në mënyrë që bashkatdhetarët të informohen për pajisjen me dokumente të gjendjes civile dhe të identifikimit, për pikat kufitare, si dhe mundësitë për investime në letrat me vlerë.

Drejtori i Policisë së Kosovës theksoi se policia do ta ofrojë ndihmën aty ku do të ketë nevojë, gjithnjë duke pasur parasysh mbrojtjen e qytetarit.

Ai tha se edhe në pikat kufitare e kanë shtuar numrin e personelit, që bashkatdhetarëve t’u krijohen lehtësi në qarkullim dhe të mos presin gjatë me rastin e kalimit kufitar. Murati dhe Maxhuni u pajtuan që bashkatdhetarët të njoftohen vazhdimisht për gjendjen në pikat kufitare, me qëllim të evitimit të pritjes në radhë të gjata. Për këtë qëllim, ata mund t’i shfrytëzojnë informatat që ofrohen nëpërmjet vegëzës www.mpb-ks.org/qkmk.