400 lëndë për korrupsion të deponuara në gjykata

Nga statistikat që ka grumbulluar Këshillit Gjyqësor të Kosovës, del se numri i lëndëve të natyrës korruptive sillet rreth 400 sosh. Me këtë lindë pritet të merren kryesisht gjyqtarët kosovarë

Në gjykatat e Kosovës aktualisht janë të deponuara rreth 400 lëndë që kanë të bëjnë me korrupsionin në të gjitha nivelet, dhe presin zgjidhje përfundimtare. Kështu ka deklaruar kryesuesi i Këshillit Gjyqësor të Kosovës, Nehat Idrizi, i cili premton se këto lëndë do të trajtohen me kompetencë të plotë nga gjyqtarët vendorë.

Sipas tij, zvogëlimi i kompetencave të EULEX-it, në fushën e sundimit të ligjit, do t’ua mundësojë gjyqtarëve vendorë që të merren me shqyrtimin e të gjitha rasteve të reja gjyqësore, citon gazeta “Zëri”. Idrizi thotë se Gjykatat përparësi u kanë dhënë zgjidhjes së lëndëve penale për të mos ardhur deri te parashtrimi i tyre, ndërsa edhe ato korruptive, siç tha ai mbesin prioritet.

“KGJK-ja ka hartuar edhe një strategji tjetër që ka të bëjë me zgjidhjen e lëndëve të natyrës korruptive. Duke e parë rrezikshmërinë dhe peshën e këtyre lëndëve është paraqitur nevoja që të hartohet ky plan i veprimit dhe tani është në zbatim e sipër, po ashtu edhe lëndëve të natyrës së krimit të organizuar i është dhënë prioritet në zgjidhjen e tyre”, thotë ai.

Sipas Idrizit, është hartuar edhe komisioni, i cili do ta përcjellë zgjidhjen e lëndëve të natyrës korruptive, ku ky komision ka hartuar edhe raportin e dytë, dhe nga statistikat që ka grumbulluar del se numri i lëndëve të natyrës korruptive sillet rreth 400 sosh.

“Të gjitha lëndët janë në procedurë e sipër pavarësisht prej fazave të procedimit penal një numër prej këtyre lëndëve është kryer”, deklaroi ai.