Taulant Xhaka vazhdon me Baselin

“Taulant Xhaka ka nënshkruar të shtunën zgjatjen e kontratës me FC Basel. Kontrata e tij, që përfundonte më 30 qershor 2018 është zgjatur për tre vite të tjera. Tashmë, marrëveshja e re Xhakës zgjat deri më 30 qershor të vitit 2021, me të drejtën e rinovimit për një tjetër vit”, thuhet në njoftimin për media

Taulant Xhaka i ka dhënë fund të gjitha zërave rreth të ardhmes së tij te skuadra e Baselit, duke rinovuar kontratën me klubin kampion të Zvicrës, shkruan albinfo.ch.

Ka qenë vetë klubi që ka bërë publik vendimin e mesfushorit 25-vjeçar nëpërmjet një komunikate për shtyp. “Taulant Xhaka ka nënshkruar të shtunën zgjatjen e kontratës me FC Basel. Kontrata e tij, që përfundonte më 30 qershor 2018 është zgjatur për tre vite të tjera. Tashmë, marrëveshja e re Xhakës zgjat deri më 30 qershor të vitit 2021, me të drejtën e rinovimit për një tjetër vit”, thuhet në njoftimin për media.

Futbollisti i Kombëtares shqiptare, i cili luajti në dy ndeshje të “Euro 2016” në Francë, ka ardhur që në moshën 12 vjeçare bashkë me vëllain e tij Granit Xhaka nga radhët e FC Konkordia te akademia e Baselit. Ai u aktivizua në të gjitha grupmoshat e skuadrës derisa arriti në ekipin e parë në vitin 2010.

Në janarin e vitit 2012, Xhaka u huazua për një vit e gjysmë te Grasshopper dhe arriti të fitonte menjëherë një vend si titullar te skuadra e qytetit të Zyrihut. Që nga sezoni 2013-2014 ai është kthyer përsëri te Bazeli, për të cilin deri tani regjistron 134 ndeshje kombëtare e ndërkombëtare si dhe 6 trofe të fituar (5 tituj Kampion dhe 1 Kupë të Zvicrës).

---