Ish refugjati shqiptar, Erioni, fiton të drejtën e punës në Gjermani

Në fillim të korrikut Parlamenti dhe ekzekutivi gjerman miratuan ligjin e ri për integrimin. Dhe, sipas këtij ligji, Erioni mund të qëndrojë në Gjermani

Erion Xahu kishte ardhur në Gjermaninë vitin 2015 si refugjat. Shanset për t`iu njohur azil ishin baras me zero por zelli për punë dhe durimi i është shpërblyer Erionit. Ai dhe shefi i tij, Lars Grünhoff, pronar i një furre dhe ëmbëltoreje, tash mund të marrin frymë lirisht: Erionit i është lejuar qëndrimi në Gjermani dhe përfundimi i zanatit të konditorit. E gjithë kjo është bërë e mundur falë ligjit të ri mbi integrimin, shkruan handwerk.com.

Ai është tashmë i katërti praktikant me prejardhje të huaj që fillon kualifikimin në “Grünhoffs Backstuuv”. Në shtator, Erionn Xahu nga Shqipëria do ta fillojë trajnimin për ëmbëltor në Norden-Norddeich, transmeton albinfo.ch. Deri pak javë më parë kjo gjë vihej në pikëpyetje. Megjithëse Erioni kishte një kontratë për trajnim, kërkesa e tij për azil i ishte refuzuar. Kjo, me arsyetimin se Shqipëria konsiderohet “vend i sigurt”. Për këtë arsye ai, si refugjat ekonomik, duhej të lëshonte Gjermaninë. “Erioni tashmë i kishte bërë gati valixhet”, thotë Grünhoff.

Por ndërkohë ngjarjet u zhvilluan ndryshe. Në fillim të korrikut Parlamenti dhe ekzekutivi gjerman miratuan ligjin e ri për integrimin. Dhe, sipas këtij ligji, Erioni mund të qëndrojë në Gjermani, përcjell albinfo.ch. Grünhoff do ta kishte të vështirë ta lëshonte nxënësin e tij të zellshëm, pasi që aftësitë e tij praktike e kishin bindur për përgatitjen e tij.

Nga ana tjetër pa Erionin, një vend për ndjekjen e zanatit do të mbetej i zbrazët në ndërmarrjen që numëron 120 punëtorë. Këtë vit nuk ka konkurruar asnjë i ri gjerman për një vend të tillë.

“Edhe pse ne proklamojmë se praktikantët nga viti i tretë i praktikës i paguajmë mbi tarifën normale, po bëhet gjithnjë më e vështirë të gjejmë kandidatë të rinj”, thekson Grünhoff. Prandaj ai është gëzuar edhe më shumë nga fakti se Erioni, pas përfundimit të praktikumit, ka shfaqur interesim edhe për ndjekjen e kualifikimit.

Fakti se shqiptar 25 vjeçar mund të mbetet në Gjermani, i detyrohet vendimit të përmendur nga 8 korriku. “Një rast fatlum”, thotë Grünhoff.

Vet Erioni, i cili jeton prej 18 muajsh në Ostfristland është i kënaqur se po i lejohet qëndrimi. “Unë kam dëshiruar gjithmonë të punoj si ëmbëltor”, thotë ai.