Brenda vitit në Kosovë u kurorëzuan 16 mijë çifte bashkëshortore

Statistikat e Kurorëzimeve në Kosovë tregojnë se brenda vitit 2015, në Kosovë janë kurorëzuar 16 274 qifte-bashkëshortore. Prej tyre 92.8 për qind janë shqiptarë

Republika e Kosovës posedon një popullsi rezidente me 1.8 milionë banorë, ndërsa sipas statistikave të publikuara të enjten (sot) nga Agjencia e Statistikave të Kosovës (ASK), në vitin 2015 janë kurorëzuar 16 274 çifte bashkëshortore. Prej tyre 92.8 për qind janë shqiptarë etnik.

Të dhënat e paraqitura në këtë publikim, sipas ASK-së, janë paraqitur sipas bazës së grumbullimit të të dhënave administrative për vitin 2015 nga zyrat e Gjendjes Civile në Kosovë, ku janë grumbulluar gjithsej 17 494 fleta statistikore për kurorëzime DEM-3.

“Mosha mesatare e të martuarve ishte 29.5 vjeçare. Prej tyre, mosha mesatare e meshkujve ishte 31.2 vjeç, ndërsa mosha mesatare e femrave 27.7 vjeçare”, thuhet në raport.

Kurorëzimet sipas grup-moshave, dominojnë femrat e moshës 20-24 vjeçare me 5 604 ose 34.4 për qind, ndërsa te meshkujt dominon mosha 25-29 vjeçare me 5 020 ose 30.8 për qind.

“Komuna e Prishtinës zë vendin e parë në Kosovë me 1 403 kurorëzime ose 8.0 për qind, pastaj vjen Prizreni 1 325 ose 7.6 për qind, ndërsa në vendin e tretë gjendet Podujeva me 1 206 ose 6.9 për qind të kurorëzimeve”.

Sipas përgatitjes shkollore, dominojnë femrat dhe meshkujt me shkollë të mesme. “Numri i femrave të kësaj kategorie është 10 656 ose 65.5%, kurse e meshkujve 12 002 ose 73.7%”, thuhet në statistikat e publikuara nga ASK, raporton Albinfo.Ch.