Kosova dhe Austria pritet të nënshkruajnë marrëveshjen për sigurime sociale, teksti i së cilës tashmë është dakorduar. Kështu ka njoftuar Ministria për Punë, Familje dhe Vlerat e Luftës Çlirimtare pas takimit të ministrit Andin Hoti me ambasadorin e Austrisë në Kosovë, Georg Schnetzer, përcjell albinfo.ch.
Sipas njoftimit të ministrisë, marrëveshja pritet të kalojë së shpejti procedurat e nevojshme dhe të nënshkruhet.
Ajo do të mundësojë njohjen dhe bashkërendimin e periudhave të sigurimit, si dhe realizimin e të drejtave pensionale për qytetarët që kanë punuar në Kosovë dhe në Austri.
Në takim mori pjesë edhe Rita Glavitza, udhëheqëse e Zyrës Koordinuese të Agjencisë Austriake për Zhvillim (ADA) në Prishtinë.
Bashkëbiseduesit diskutuan për avancimin e bashkëpunimit zhvillimor, shkëmbimin e përvojave dhe shfrytëzimin e ekspertizës austriake në sektorët që mbulon ministria.
Ministri Hoti e falënderoi ambasadorin për përkrahjen e vazhdueshme të Austrisë dhe e njoftoi për prioritetet, planet dhe mundësitë konkrete për bashkëpunim./Albinfo.ch