Nën ethet e pritjes së paraqitjes së olimpionikëve kosovarë në Rio, sportistë tjerë kosovarë kanë filluar përgatitjet për sfidat që ata i presin në muajt e ardhshëm.  Derisa basketbollistët  të përforcuar me lojtarë nga jashtë  do të marrin pjesë për herë të parë në kualifikime, hendbollistët kanë pasur përvojat e para  në skenën evropiane. Për një paraqitje sa më të denjë në arenën evropiane, Federata e Hendbollit të Kosovës ka emëruar para disa javësh perzgjedhës të ri Taip Ramadanin, i cili sjell përvojë si lojtar dhe përzgjedhës i Kombëtares së Australisë.

Edhepse nga kontinenti i largët, Taip Ramadani nuk është i panjohur për skenën e hendbollit kosovar. Në vitin 2004 ai pati edhe disa paraqitje në fanelën e FHK-së në disa ndeshje ndërkombëtare.

“Me Taipin kemi pasur gjithnjë kontakt. I kemi besuar postin e përzgjedhësit  dhe jemi të sigurtë se përvoja e tij do të na ndihmoj shumë në përparimin e hendbollit në vend”, flet për Albinfo.ch, Izet Gjinovci, sekretar i përgjitshëm i FHK-së.

“Na presin sfida të vështira në rrethin e parë te kualifikimeve për Kampionatin Evropian në vitin 2020 por besoj se stafi i trajnerëve  me lojtarët nga vendi dhe nga jashtë, do të përgaditet maksimalisht për këto sfida”,  përfundon Gjinovci  optimist.

Përzgjedhësi  i  ri Ramadani dhe ndihmëstrajnerët e  tij Fatmir Muhaxheri, Jeton Havolli dhe Veton Hajrizi (trajner i portierëve), në grumbullimin e parë kishin në dispozicion 16 lojtarë të Superligës kosovare. Në grumbullimin e ardhshëm atyre pritet tu bashkangjiten edhe disa lojtarë nga jashtë, ndër të tjerët edhe Sharr Ramadani dhe Valon Dedaj nga Superliga zvicerrane. Federata ka identifikuar shumë hendbollistë kosovarë që luajnë në shtete të ndryshme evropiane.

Këta lojtarë veç janë kontaktuar dhe gjasat janë të mira që disa prej tyre ti bashkangjiten Kombëtares në takimet kualifikuese kundër Turqisë  në Nëntor të këtij viti si dhe kundër Estonisë në Janar të vitit të ardhshëm.

Perzgjedhësi Ramadani dukej të ishte i ndarë i kënaqur me stërvitjen a parë të lehtë me lojtarët e tij. Në tetë ditët  e ardhshme, ai do ta ketë rastin ti njoh për së afërmi ata në kampin që po mbahet në Prishtinë. Në stërvijet qe do të mbahen dy herë në ditë dhe por edhe në senca tjera, ai do të ketë rastin edhe tu prezentoj të përzgjedhurve të tij  filozofinë e tij të hendbollit. Vetë angazhimi i tij nga ana e Federatës është një hap i duhur në freskimin e hendbollit kosovar. Hapi i Taip Ramadanit për kthim nga diaspora për investim të diturisë në Kosovë është për tu përshëndetur. Se çka e shtyri atë të pranoj këtë detyrë, për planet dhe pritjet e tij nga kjo sfidë e për shumë gjëra tjera, do të mësojmë më shumë në një intervistë eksluzivetë tij  për albinfo.ch.