Me “meritë” të SVP-së, Zvicra, e pesta në Evropë për populizëm

Më shumë populizëm se në Zvicër ka vetëm në vendet si Greqia, Hungaria, Polonia dhe Italia, konstaton studimi “Authoritarian Populism Index”

Rrëshqitja në të djathtë dhe në autoritarizëm e populizëm në përgjithësi, mund të vihet re në shumicën e shoqërive dhe qeverive evropiane. Ky fenomen vjen më i theksuar sidomos si pasojë e flukseve të mëdha të refugjatëve nga bota e tretë dhe nga Ballkani, që kanë përjetuar këto shoqëri dy-tri vitet e fundit. Si përfundim, as Zvicra nuk ka mundur të mbetet indiferente karshi këtyre lëvizjeve.

Siç shkruan portali swissinfo.ch., Zvicra është në vendin e pestë në Evropë për nga “përbërja populiste” ose ndikimi i populizmit të djathtë në politikën e saj. Këtë përfundim e ka nxjerrë një studim i realizuar nga instituti liberal suedez për hulumtimin e opinionit, “Timbro”, transmeton albinfo.ch. Më shumë populizëm se në Zvicër ka vetëm në vendet si Greqia, Hungaria, Polonia dhe Italia, konstaton studimi.

“Authoritarian Populism Index”, siç quhet ky raport i publikuar të enjten, autoritarizmin dhe populizmin në politikën zvicerane ia referon pranisë së fuqishme të partisë populiste të djathtë SVP në këtë politikë, përcjell albinfo.ch. SVP/UDC është prej vitesh partia më e madhe në Zvicër. Në zgjedhjet e fundit madje, ajo është rritur nga 26.6% në 29.9%.

Në vazhdim në këtë studim theksohet se SVP është e përfaqësuar me dy ministra në kabinetin qeveritar. Suksesin e kësaj partie, autori i studimit, Andreas Johansson Heinö  e shpjegon me faktin  se SVP ishte pjesë e qeverisë edhe para fillimit të “strategjisë së re të djathtë”.

Studimi tregon se partitë populiste kurrë sikur tash nuk kanë pasur sukses të zgjidhen kaq shpesh në shtetet e Evropës. Mesatarisht çdo i pesti qytetar evropian ka votuar gjatë vitit 2015 pë një parti populiste, të djathtë ose të majtë.

Kriza e refugjatëve ka qenë sipas autorit të përmendur shkaku i këtij trendi.