Policia në gjah kundër fajdexhinjve

Policia e Kosovës ka arrestuar 8 persona të involvuar në vepra penale që lidhen me fajde. Ata kanë përfituar nga viktimat 400 mijë euro

Foto ilustrim

Drejtoria për Hetimin e Krimeve Ekonomike dhe Korrupsionit me asistencë edhe të njësive tjera të Policisë së Kosovës, ka arrestuar tetë persona që lidhen me veprat penale të fajdeve. Aksioni është zhvilluar në disa lokacione në Rrafshin e Dukagjinit, konkretisht në Pejë, Deçan dhe Gjakovë.

Sipas njoftimit të Policisë, janë kontrolluar 14 lokacione të ndryshme, ku përfshihen 10 shtëpi, 2 banesa dhe 2 lokale, që gjenden në pronësi të 10 personave të dyshuar në rast, tetë prej të cilëve janë arrestuar, ndërsa 2 të tjerëve iu janë lënë ftesat për paraqitje. Të gjithë këta janë shqiptarë të Kosovës.

“Personat e involvuar dyshohet se që nga viti 2014 e deri me tani viktimës i kanë dhënë para me fajde dhe shuma e përfituar dyshohet të jetë rreth katërqind mijë euro. Gjithashtu, në këtë operacion gjatë bastisjes janë gjetur edhe dëshmi tjera dhe armë”, thuhet në njoftim.