Shqipëria, vendi me rritje të lartë të të ardhurave nga emigrantët

Shqipëria ishte i vetmi vend i Evropës dhe Azisë Qendrore që pati një rritje të lartë të të ardhurave nga emigrantët, me 8% në vitin 2015.

Këtë vlerësim, sipas Monitor, e ka bërë Banka Botërore, duke pasur parasysh faktin se norma e rritjes së remitancave për vendet në zhvillim ka rënë nga 3.2% në vitin 2014 në 0.4% në vitin 2015. Pohohet të jetë një shifër tepër e lartë.

Ekspertë vendës e lidhin faktin e rritjes së remitencave për Shqipërinë me rritjen e numrit të emigrantëve jashtë vendit, sidomos më 2015. Sipas të dhënave të Eurostat, numri i azilkërkuesve nga Shqipëria është rritur me 439%, duke arritur në gati 66 mijë në vitin 2015, nga 12.2 mijë që ishin një vit më parë, raporton revista Monitor, përcjell albinfo.ch.