Kthehet në Shqipëri trupi i pajetë i Erjon Toros

Erjoni 34­vjeçar, në momentin e rënies së tërmetit në Itali ndodhej në banesë së bashku me gruan dhe 2 vajzat. Të bijat u nxorën nga gërmadhat me lëndime të lehta, ndërsa bashkëshortes iu amputuan dy këmbët

Mëngjesin e sotëm është kthyer në vendlindje trupi i pajetë i Erjon Toros, viktimës   shqiptare që humbi jetën në tërmetin që goditi më 24 gusht Italinë qendrore. Arkivoli i 34­vjeçarit ka mbërritur rreth orës 08:30 në portin e Vlorës nga Brindisi dhe do të dërgohet në vendlindjen e tij, fshatin Kurjan të Roskovecit, ku do t’i jepet lamtumira e fundit.

Xhaxhai i viktimës pohoi për ‘News24’ se me ardhjen e trupit të tij iu lehtësua disi dhimbja.

“Jam i kënaqur nga shteti shqiptar që ma solli trupin e nipit shumë shpejt. Na u lehtësua më shumë dhimbja”, tha ai.

Ambasada shqiptare në Romë ka përgatitur të gjithë dokumentacionin e duhur për të riatdhesuar trupin e të ndjerit, ndërsa shpenzimet për kthimin e tij në atdhe u mbuluan tërësisht nga qeveria shqiptare.

Emigranti 34­vjeçar, në momentin e rënies së tërmetit ndodhej në banesë së bashku me gruan dhe 2 vajzat. Të bijat u nxorën nga gërmadhat me lëndime të lehta, ndërsa bashkëshortja pas një ndërhyrje kirurgjikale humbi të dyja këmbët. Ajo vijon të jetë e shtruar në spitalin e Akuilës.

Gjendja e saj shëndetësore është e qëndrueshme dhe vazhdon të jetë nën mbikëqyrjen e mjekëve. Erjon Toro ishte djali i vetëm i një familje me 5 anëtarë dhe jetonte në Itali me familjen e tij që prej 16 vjetësh.

Ndryshe, më shumë se 260 persona humben jetën nga tërmetet që tronditën të mërkurën qendrën e Italisë.