Hiqet nga rendi i ditës ratifikimi i Demarkacionit

Me kërkesë të kryeministrit Isa Mustafa, është tërhequr nga rendi i ditës, projektligji për ratifikimin e Demarkacionit me Malin e Zi. Ky vendim është marrë pasi që në sallë nuk ka ka qenë prezente Lista Serbe

Me dy orë vonesë Kuvendi i Kosovës ka nisur seancën plenare, të parën pas pushimeve verore, me shumë tensione ndërmjet partive politike. Por e veçanta është se nga kjo seancë me kërkesë të kryeministrit Isa Mustafa, është tërhequr projektligji për ratifikimin e Demarkacionit me Malin e Zi.

Ky vendim është marrë pasi që prezentë në sallë nuk ka qenë Lista Serbe, e cila siç tha kryeministri ka kushtëzuar Qeverinë me “koncesione”.

Por, sipas ligjvënësve opozitarë, qeveria e ka tërhequr ratifikimin e marrëveshjes sepse nuk i ka pasur votat e nevojshme për votim. Për të kaluar marrëveshjet ndërkombëtare  kërkohen dy të tretat e votave të të gjithë deputetëve të Kuvendit, ndërsa koalicioni qeverisës në këtë seancë nuk i ka pasur ato.

Në fillim të seancës, lëvizja Vetëvendosje akuzoi Policinë e Kosovës, se nën direktivat politike ka arrestuar 6 aktivistët e kësaj partie, duke i akuzuar për terrorizëm, respektivisht sulm me granatahedhës ndaj Kuvendit të Kosovës.

Në anën tjetër, protesta e aktivistëve të Vetëvendosjes dhe banorëve të rajonit të Rugovës, ka vazhduar e qetë, pa asnjë incident.