Maqedonia shet objektin e konsullatës në Cyrih, trashëgimi nga ish-Jugosllavia

Për Konsullatën në Cyrih Qeveria kërkon 3.000.000 franga zvicerane, ndërsa çmimi fillestar për ambasadës në kryeqytetin australian është 1.100.000 dollarë australianë

Qeveria e Maqedonisë shet objektet e Konsullatës në Cyrih (Zvicër) dhe Canberra (Australi), të fituara në rrugë të suksesionit të pasurisë dimplomatike dhe konsullore të ish-Jugosllavisë, njoftojnë mediat në Shkup, përcjell albinfo.ch.

Informacioni është konfirmuar nga Ministria e Punëve të Jashtme dhe vendimi tashmë është publikuar në Gazetën Zyrtare. Pse po i shet Maqedonia ambasadat dhe pse do të shpenzohen paratë, nuk jepet asnjë shpjegim, thonë mediat në Shkup.

Për Konsullatën në Cyrih Qeveria kërkon 3.000.000 franga zvicerane, ndërsa çmimi fillestar për ambasadës në kryeqytetin australian është 1.100.000 dollarë australianë. Në njoftimin e ambasadës në Kanberra thuhet se është në shitje vetëm objekti, ndërsa në Zurich, përveç objektit të konsullatës, është në shitje parcela e tokës.

Përndryshe, nga ndarja e misioneve diplomatike dhe konsullore në ish-Jugosllavi më 2006 Maqedonia kishte përfituar katër ndërtesa nga Ambasada e ish-Jugosllavisë: në Canberra, Australi, Seksionin Konsullor në Ambasadën e ish-Jugosllavisë në Athinë, Greqi, apartamentin përfaqësues në Romë, Itali, si dhe objektin në Cyrih.