Jozefi dhe Maria nga Zvicra i dhurohen një kishe katolike në Kosovë

Financimi i transportimit të këtyre figurave tashmë është siguruar përmes donacioneve private. Mirëpo, ende nuk është krejtësisht e sigurt nëse Jozefi dhe Maria nga Andermatti do të udhëtojnë me siguri në Kosovë

Me rastin e rinovimit të Kishës së Shën Pjetrit dhe Paulit në Andermatt, Kantoni Uri, që ishte bërë në vitin 1994-9, figurat e Jozefit dhe Marisë nga altarët anësorë të kishës qenë zëvendësuar me figura më të vjetra, shkruan gazeta Urner Wochenblatt.

Dhe tash, figurat prej një metër e gjysmë të shenjtorëve do t`i dhurohen një kishe katolike të re që është duke u ndërtuar në një famulli katolike në Kosovë, transmeton albinfo.ch.

Financimi i transportimit të këtyre figurave tashmë është siguruar përmes donacioneve private. Mirëpo, ende nuk është krejtësisht e sigurt nëse Jozefi dhe Maria nga Andermatti do të udhëtojnë me siguri në Kosovë.

Vendimin për këtë udhëtim pritet ta marrë famullia katolike në Andermatt në muajin dhjetor të këtij viti.