Të Gjelbrit propozojnë një “Green Card” për të huajt e talentuar

Propozimi i Partisë së Gjelbër të Gjermanisë për t`ua lehtësuar qëndrimin emigrantëve me kuakifikime të mira propozon një kartë që ngjan me "Green Card" të Kanadasë

KEYSTONE

Po të pyetej Partia e Gjelbër, diplomat e masterat universitarë, përvoja e punës, njohuritë e gjermanishtes, do të ishin kriteret përzgjedhëse që do të vendosin nëse dikush e merr “kartën e talentit” apo jo. Kjo kartë sipas tyre do t’u mundësojë të huajve të marrin një leje qëndrimi në Gjermani për një vit edhe pa pasur konkretisht një vend pune.

Deri më tani kjo vizë është e mundur për emigrantët që duan punë, vetëm me premtimin për një vend pune, shkruan deutschewelle.de. Zëdhënësi për migrantët i Partisë së Gjelbër, Volker Beck është i mendimit, se me këtë kartë, që i ngjason sistemit kanadez të “Green Card” do të jetë më e lehtë për sipërmarrjet e nivelit të mesëm dhe ato të vogla, që të sigurojnë personel, kjo sepse ato nuk duhet të kërkojnë fuqi punëtore jashtë.

Sipas Volker Beck, Gjermania nuk mund të shpresojë vetëm se në të ardhmen do të vijnë në një numër i mjaftueshëm qytetarësh nga BE apo refugjatë që do të plotësojnë nevojën për fuqi punëtore. “Prandaj kemi nevojë për ligje të emigracionit, që liberalizojnë rregulloret për migracionin e punës dhe që formësohen në mënyre pragmatike.”

Nërsa kryetarja e fraksionit të Të Gjelbërve, Katrin-Göring-Eckardt e përshkroi “kartën e talentit” si një “sistem me frymëmarrje që i përshtatet në mënyrë dinamike nevojës së vazhdueshme për fuqi punëtore.” Për detajet, Partia e Gjelbër diskuton të premten (16.09) në një konferencë në Berlin.