Kosovarët mbjellin vetëm 45 për qind të tokës

Nga gjithsej sipërfaqja e shfrytëzuar e tokës bujqësore, pjesa më e madhe i përket livadheve dhe kullosave

Vetëm 45 për qind e tokës në Kosovë punohet nga blegtorët apo kooperativat bujqësore private, ndërsa pjesa tjetër mbetet djerrinë. Kështu thuhet në raportin e fundit që ka nxjerr Agjencia e Statistikave të Kosovës (ASK) lidhur me rezultatet e Anketës së Ekonomive Bujqësore (AEB) për vitin 2015.

Ky publikim ofron të dhëna për shfrytëzimin e tokës bujqësore, kulturat bujqësore, blegtorinë, inputet bujqësore (plehrat minerale, organike, pesticidet) dhe shpenzimet në ekonomitë bujqësore.

Rezultatet e kësaj ankete tregojnë se në Kosovë sipërfaqja e shfrytëzuar e tokës bujqësore është 410 478 hektarë, përfshirë tokën e përbashkët, private dhe publike.

“Nga gjithsej sipërfaqja e shfrytëzuar e tokës bujqësore, pjesa më e madhe i përket livadheve dhe kullosave me 52.7 për qind si dhe tokës së punueshme, ku arat marrin pjesë me 45.2 për qind, kulturat shumëvjeçare (pemët, vreshtat, fidanët) 2 për qind dhe kopshtet 0.1 për qind”, thuhet në raportin e ASK-së.

Nga gjithsej tokë e punueshme – ara, pjesa më e madhe është me drithëra rreth 72 për qind; bimë foragjere me 15.4  për qind; perime me 4.2 për qind; patate me 1.8 për qind; bishtajore me 1.7 për qind dhe kultura të tjera me 4.2%.

Sipërfaqe e ujitur, të paktën një herë gjatë periudhës referuese të anketës, është 20 456 hektarë.

Sipas rezultateve të Anketës së Ekonomive Bujqësore, numri i gjedheve është 258 505 krerë; i deleve është 198 mijë krerë; i dhive është 30 mijë krerë; i derrave është 44 mijë  krerë; i njëthundrakëve (kuaj, mushka, gomarë) është 2577 krerë; i shpezëve (pula, biba, rosa dhe pata) është 2 57 mijë copë; dhe gjithsej numri i koshereve të bletëve është 157 mijë koshere.