Alarm për bombë në aeroplanin rus

Menjëherë pas alarmit, janë shkarkuar të gjitha valixhet nga bagazhi i aeroplanit dhe janë detyruar të gjithë pasagjerët që t`i verifikojnë ato

Pasagjerët e një aeroplani rus udhëtarësh të kompanisë Aeroflot është dashur të evakuohen sot rreth orës 13 për shkak të një alarmi për bombë. Aeroplani ishte në fazën pak para nisjes. Të 115 pasagjerët kanë shpëtuar pa asnjë lëndim, njofton srf.ch.

Një burrë ishte paraqitur në sportelin e kompanisë së përmendur dhe kishte njoftuar se, sipas tij, në aeroplan gjendej një bombë, njofton prokuroria e Gjenevës. Policia e ka ndaluar personin në fjalë dhe ndaj tij po zhvillohet procedurë penale.

Aeroplani duhej të fluturonte në drejtim të Moskës, ka bërë të ditur një zëdhënës i Aeroportit të Gjenevës.

Menjëherë pas alarmit, janë shkarkuar të gjitha valixhet nga bagazhi i aeroplanit dhe janë detyruar të gjithë pasagjerët që t`i verifikojnë ato. Ekspertët e materieve shpërthyese nga Policia e Gjenevës e kanë kontrolluar aeroplanin. Alarmi ka shkaktuar një vonesë të madhe të pasagjerëve të cilët është dashur të shpërndahen në aeroplanë të tjerë.