Rritet numri i punëtorëve të huaj nga zonat kufitare me Zvicrën

Në regjionin kufitar rreth Liqenit të Gjenevës rritja ka qenë më e madhe, gjegjësisht 6.5 për qind. Por në të njëjtën kohë, në regjionin kufitar me Italinë, është shënuar një ulje prej 0.6 për qind e këtij numri

Numri i të huajve nga zonat kufitare të shteteve fqinje, të cilët vijnë për çdo ditë për të punuar në Zvicër, po vazhdon të rritet. Kështu, Zyra Federale e Statistikave, në kuartalin  (tremujorin) e tretë të këtij viti ka regjistruar gjithsej 314 mijë punëtorë të tillë ndërkufitarë, bën të ditur srf.ch.

Kjo shifër është për 3.5 për qind ose për 10 mijë e pesëqind më e madhe se në kuartalin e tretë të vitit të kaluar.

Ndërkaq, zhvillimet në këtë drejtim ndryshojnë sipas regjionit. Kështu në regjionin kufitar rreth Liqenit të Gjenevës (Kantoni i Gjenevës dhe ai i Vaudit) rritja e punëtorëve të kësaj kategorie ka qenë më e madhe, gjegjësisht 6.5 për qind, transmeton albinfo.ch. Por në të njëjtën kohë, në regjionin kufitar me Italinë, në Kantonin e Tiçinos, është shënuar një ulje prej 0.6 për qind e këtij numri.

Nga Tiçino, viteve të fundit ka pasur më së shumti ankesa për italianët e quajtur “Frontalieri” që vinë të punojnë në kantonin jugor të Zvicrës, pasi që, sipas qarqeve konservative të këtij regjioni, ata “po ua grabisin punën” vendorëve.