Modeli dual zviceran i arsimit, të zbatohet edhe në Kosovë

Ministri i Arsimit, Shkencës dhe Teknologjisë nga Kosova, Arsim Bajrami, po qëndron në Cyrih të Zvicrës, ku po merr pjesë në disa takime të rëndësishme për rolin dhe ndikimin e teknologjisë inovative në fushën e arsimit dhe ngritjen e cilësisë.

“Ministri Bajrami foli për reformat e arsimit në Kosovë, me theks të veçantë rreth orientimit të të rinjve tanë drejt arsimit dhe aftësimit profesional, i cili realisht ofron mundësi më të mira për punësim të të rinjve, e që janë pjesa më vitale e shoqërisë sonë”, thuhe në një komunikatë të Ministrisë kosovare të Arsimit.

Më tutje thuhet në njoftim se ministri Bajrami mori mbështetje të plotë nga Qeveria e Zvicrës për të aplikuar modelin dual të Zvicrës në Kosovë, model ky që nënkupton lidhjen e shkollës me kompani të ndryshme të biznesit.

“Ky model është më se i nevojshëm për ne në Kosovë, sepse krahas njohurive teorike, nxënësve u mundëson përfitimin e shkathtësive praktike në ato kompani ku mund të përfshihen”, tha ministri Bajrami, përcjell albinfo.ch.

Ministri kosovar i Arsimit tha se një përvojë e tillë vlerësohet shumë e nevojshme edhe për kërkesat e tregut të punës, ku kompanitë përkatëse kanë mundësi edhe të njihen nga afër me shkathtësitë e nxënësve.