Preferohen ekspertë zviceranë për zbardhjen e vdekjes së Astrit Deharit

Lëvizja Vetëvendosje ka dilema sa i përket zbardhjes së vdekjes së Astrit Deharit. Për këtë arsye prezenca e ekspertëve ligjor të pavarur, sipas LVV-së, do të rriste kredibilitetin e rastit

Përfaqësuesit e Lëvizjes Vetëvendosje, partisë më të madhe opozitare në Kosovë, preferojnë ekspertë të pavarur nga Zvicra apo Shqipëria për t’ia bërë obduksionin Astrit Deharit, 26 vjeç, i cili u gjet i vdekur në Burgun e Prizrenit. I ndjeri i takonte Lëvizjes Vetëvendosje dhe që nga dita e mbrëmshme, nuk po dihen rrethanat e qarta të vdekjes së tij.

Sekretari i Lëvizjes Vetëvendosje, Dardan Molliqaj, ka thënë se zyrtarët ligjor për hetimin dhe rastit do të jenë më shumë gjasë nga Shqipëria. Megjithëse nuk ka përjashtuar mundësinë edhe ekspertëve nga Zvicra.

“Zyrtarët ligjor do të jenë nga Republika e Shqipërisë sipas të gjitha gjasave. Megjithatë ne nuk po përjashtojmë mundësinë që të kemi edhe ekspertë nga Zvicra”, ka thënë Molliqaj, sipas të cilit, Vetëvendosje ka dilema sa i përket zbardhjes së këtij rasti për këtë arsye prezenca e ekspertëve ligjor të pavarur dhe të ftuar nga familje, do të rriste kredibilitetin e rastit.

Për shkak të deklaratave kontradiktore të dhëna nga Prokuroria e Shtetit, Shërbimi Korrektues dhe Policia e Kosovës, familja Dehari kërkoi nga Departamenti i Mjekësisë Ligjore që autopsia e trupit të Astrit Deharit të mos bëhet në asnjë mënyrë pa prezencën e mjekëve të pavarur dhe neutralë që do të caktohen nga familja.

“Deklarimet institucionale që e cilësojnë si të dyshimtë vdekjen e djalit tonë, si dhe kontradiktat në deklaratat e institucioneve të ndryshme, janë tejet shqetësuese për ne dhe insistojmë që në asnjë mënyrë të mos bëhet autopsia pa prezencën e mjekëve që do të caktohen nga familja”, thuhet në reagimin e familjes.