Papa Françesku flet për martirët shqiptarë

Ai ka thënë se 38 martirët janë shembull edhe për të tjerët. Ata ishin viktima të persekutimit të regjimit komunist në Shqipëri

Dy ditë më parë në Shkodër u lumturuan 38 martirë, viktima të persekutimit të regjimit komunist në Shqipëri, shkruan albinfo.ch.

Për këtë rast ka folur edhe Papa Françesku. Ai ka thënë se martirët janë shembull edhe për të tjerët.

“Në qytetin e Shkodrës të Shqipërisë u lumturuan 38 martirë: dy peshkopë, priftërinj të shumtë, një semiraniste dhe disa laikë, viktima të persekutimit të egër ateist, që e dominoi atë vend gjatë shekullit të kaluar. Ata preferuan të vuajnë burgun, torturat e deri edhe vdekjen, vetëm që të ishin besnikë të Kishës dhe të Krishtit.

Shembulli i tyre na ndihmoftë të gjejmë te Zoti, forcën që na duhet në momentet e vështirësitë e që frymëzon qëndrime mirësie, faljeje dhe paqeje”, ka thënë ai.

Ceremonia e lumturimit të 38 martirëve të pushkatuar nga regjimi komunist, për shkak të besimit të tyre, u zhvillua gjatë ditës së shtunë në qytetin e Shkodrës, në Katedralen e Shën Shtjefnit, përpara 10 mijë pelegrinëve nga Shqipëria, Kosova, Mali i Zi dhe Kroacia.