Mbyllja e “rrugës ballkanike” ul numrin e azilkërkuesve

Këtë rënie, ashtu sikurse edhe atë të gjithë periudhës së deritashme të vitit 2016, SEM e shpjegon me mbylljen e të ashtuquajturës “Rrugë e Ballkanit” në muajin mars të këtij viti.

Ilustrim

Pas të dhënave për kuartalin e tretë të vitit që tregonin për një rënie të madhe të numrit të azilkërkuesve, edhe në muajin tetor ka vazhduar ky trend. Kështu, sipas Sekretariatit Shtetëror për Migracion (SEM) në fund të tetorit janë regjistruar 2096 kërkesa për azil të bëra gjatë atij muaji, që janë për 4 për qind më pak se në muajin shtator. Ndërsa në tetorin e një viti më parë numri i kërkesave për azil ka qenë madje pothuaj dyfish më i madh.

Rënia më e madhe e numrit të azilkërkuesve është regjistruar te afganët, njofton SEM, shkruan albinfo.ch Por po ashtu rënie të theksuar ka pasur edhe në numrin e kërkesave për azil të njerëzve nga Iraku dhe Siria. Këtë rënie, ashtu sikurse edhe atë të gjithë periudhës së deritashme të vitit 2016, SEM e shpjegon me mbylljen e të ashtuquajturës “Rrugë e Ballkanit”, e cila me marrëveshje është bllokuar në muajin mars të këtij viti.

Ndërkaq, numri më i madh i azilkërkuesve vazhdon të vijë nga Eritrea, edhe pse refugjatët nga ky vend afrikan gjatë gjithë vitit kanë treguar një rënie të interesimit për t`u ndalur në Zvicër. Kështu, gjatë tetorit këtu kanë paraqitur kërkesë për azil, 476 eriteranë ose 151 më pak se një muaj më parë.

Në fund të vitit 2015 ishte rrumbullakuar një numër prej 40 mijë refugjatësh ndërsa për këtë vit parashihet që ai të mos kalojë mbi 30 mijë.