Sekuestrohen 400 kilogramë kanabis nga Shqipëria

400 kilogramë kanabis janë sekuestruar nga policia italiane. Kjo sasi e madhe e drogës po vinte nga Shqipëria

Policia italiane ka bërë të ditur se ka sekuestruar 400 kilogramë kanabis në Brindisi të Italisë. Aksioni është kryer Guardia Di Finanza në qytezën e San Pietro Vernotico dhe në pranga kanë rënë dy persona, një shqiptar dhe një italian. Sipas agjencisë së lajmeve “ANSA” ndaj tyre rëndon akuza e trafikut të lëndëve narkotike, përcjell albinfo.ch.

Gjithashtu është bërë e ditur se në kuadër të këtij operacioni është arrestuar shqiptari Vezdhan Braimhaj, 48-vjeçar nga Vlora. Shqiptari po ngiste një kamion që u kontrollua pranë shtëpisë së italianit.

Droga u gjet në shtëpinë e Luca Sabetta, 37-vjeç, tregtar ambulant i kërmijve.

Një pjesë e lëndës narkotike, 248 kilogramë ishte e vendosur në fundin e dyfishtë të një kamioni, ndërsa 138 kilogramë u gjetën në banesën e shtetasit italian.

Droga dyshohet se kishte mbërritur në Itali me gomone nëpërmjet kanalit të Otrantos. Po hetohet nga origjina e drogës, koha e trafikimit të saj dhe mënyra se si ajo do të shpërndahej në tregun italian.