Ymeri takohet me ministrin zviceran, Alain Berset

Kryetari i lëvizjes “Vetëvendosje”, Visar Ymeri, i cili këto ditë po qëndron në Zvicër, ku ka marrë pjesë në Kongresin e Partisë Social-Demokrate të Zvicrës, ka takuar edhe ministrin e Punëve të Brendshme të Zvicrës, Alain Berset.

Lajmin e ka bërë të ditur Ymeri në një postim në Facebook.

“Biseduam për zhvillimet e fundit politike në Kosovë, me ç’rast e njoftuam ministrin Berset për rastin e vdekjes së Astrit Deharit në burgun e Prizrenit. Biseduam edhe për marrëveshjen ende të panënshkruar për pensione mes Kosovës dhe Zvicrës. Mosnënshkrimi i kësaj marrëveshjeje ua pamundëson qytetarëve të Kosovës realizimin e përfitimeve të tyre pensionale nga Zvicra nëse janë kthyer të jetojnë në Kosovë, edhe pse kanë kontribuar me punë e financiarisht sa kohë që kanë jetuar e punuar në Zvicër”, shkruan Ymeri në Facebook.

Delegacioni i Lëvizjes VETËVENDOSJE, të cilin e ka udhëhequr Visar Ymerin, kryetar, Fatmire Kollçaku, nënkryetare dhe Faton Topalli, deputet, në Cyrih dhe mbrëm në Bernë kanë zhvilluar dy takime me bashkatdhetarë.