Diaspora mbetet pa asnjë deputet?

Nëse llogarisim faktin që Zvicra ka qenë dhe vendi ku është regjistruar dhe numri më i madh i qytetarëve për të votuar, mund të supozojmë që kësaj radhe, diaspora si ajo shqiptare dhe ajo maqedonase mund të mbeten me zero deputetë

Në Bernë ka përfuduar procesi zgjedhor për deputetë në Parlamentin e Maqedonisë. Konfirmohet se në këtë njësi zgjedhore, më shumë vota ka fituar kandidati i BDI-së, Xhevdet Spahiu. Pas tij vjen në radhë kandidati i VMRO-së, ndërsa në vend të tretë është renditur kandidati i LSDM-së.

Rafet Hajdari, ushtrues detyre në postin e Ambasadorit të Republikës së Maqedonisë në Bernë, lidhur me interesimin e qytetarëve për të votuar, për albinfo.ch deklaroi se „gjatë ditës së sotme kanë votuar rreth 25 deri më 30 për qind të qytetarëve që janë paraqitur për të votuar. Ajo që vlen të theksohet në këtë rast, është fakti që procesi zgjedhor ka kaluar pa asnjë problem“.

Në Zvicër janë regjistruar gjithsej 4256 qytetarë për të votuar. Sipas përqindjes që na e konfirmoi zotëri Hajdari, i bie që sot në vendvotime të kenë dalë jo më shumë se 1300 persona.  Nëse llogarisim faktin që Zvicra ka qenë dhe vendi ku është regjistruar dhe numri më i madh i qytetarëve për të votuar, mund të supozojmë që kësaj radhe, diaspora si ajo shqiptare dhe ajo maqedonase mund të mbeten me zero deputetë.

Për çdo ndryshim të rezultatit, do ju imformojmë në vijim.

Irfan Agushi