Sulmuesi i vrarë i xhamisë është autor edhe i një vrasjeje tjetër

Zvicerani 24 vjeçar konsiderohet fajtor edhe për vrasjen që ka ndodhur në lagjen Schwammendingen të Cyrihut, ku të dielën ishte gjetur një burrë i vdekur në kopshtin e lojërave të fëmijëve

Keystone

Përgjegjës për sulmin e armatosur që ndodhi mbrëmë në një xhami të Cyrihut është një zviceran 24 vjeçar, i cili ndërkohë dhe është gjetur i vdekur jo larg xhamisë. Në një konferencë për media që është mbajtur sot pasdite në Cyrih, autoritetet policore kanë vërtetuar atë që supozohej mbrëmë, për lidhjen në mes të sulmit me tre të plagosur në xhami dhe kufomës së gjetur rreth 300 metra larg nga ky vend, shkruan sda.ch

Personi nuk kishte rënë në sy më parë për çrregullime psikike, ka thënë përgjegjësja e policisë kriminale të Cyrihut në konferencë. Ajo po ashtu ka theksuar se aktualisht nuk ka të dhëna që do të dëshmonin se bëhet fjalë për një sulm terrorist, transmeton albinfo.ch. Nuk ka pasur asnjë lidhje në mes të dorasit dhe xhamisë në Cyrih ku ka ndodhur sulmi.

Dëshmitarë të sulmit thonë se sulmuesi para se të shtinte me armë kishte bertitur: “Jashtë nga vendi ynë!”. Por policia nuk ka mundur ta vërtetojë këtë

Sulmuesi, sipas policisë ka pasur interesim për okultizmin. Ai konsiderohet se është fajtor edhe për vrasjen që ka ndodhur në lagjen Schwammendingen të Cyrihut, ku të dielën ishte gjetur një burrë i vdekur në kopshtin e lojërave të fëmijëve.

Vrasësi, tashmë i vetëvrarë, ka qenë shok i nguhstë me të vrarin, një kilean, moshatar i tij, me të cilin ndërkohë i kishin prishur marrëdhëniet.

Dorasi nga regjioni i Usterit (Kantoni i Cyrihut) deri pak ditë më parë kishte punuar si shitës ndërsa e kishte braktisur punën në mënyrë të përnjëhershme dhe jetonte i vetëm.