400 mijë lëndë të pazgjidhura nga gjykatat

Në Gjykatat e Kosovës vlerësohen se janë 400 mijë lëndë të pazgjidhura, prej tyre 200 mijë janë për kundërvajtje. 200 mijë lëndë janë penale, civile dhe të çështjeve tjera

Numri i madh i lëndëve të pazgjidhura në gjykatat e Kosovës, vazhdon të jetë një problem, të cilin sistemi i drejtësisë nuk po mund ta tejkalojë për vite të tëra, bën të ditur “Evropa e Lirë”.

Kryesuesi i Këshillit Gjyqësor të Kosovës, Nehat Idrizi, deklaroi për “Radion Evropa e Lirë” se gjyqtarët në gjykata të caktuara nuk e kanë përmbushur normën e lëndëve, të cilat është dashur të përfundojnë, andaj, sipas tij, numri i lëndëve të pazgjidhura vazhdon të jetë i madh.

“Janë dikur rreth 400 mijë lëndë. Prej tyre 200 mijë janë për kundërvajtje. Diku i bie që rreth 200 mijë lëndë janë penale, civile dhe të çështjeve tjera”, tha Idrizi.

Ndryshe, korrupsioni në gjyqësi, mos-efikasiteti, grumbullimi i lëndëve, ngadalësimi në reforma – janë vetëm disa nga kritikat më të shpeshta që i janë bërë sistemit të drejtësisë edhe gjatë vitit 2016 nga organizatat vendore dhe ndërkombëtare, përcjell albinfo.ch.

Vetë udhëheqës të këtyre mekanizmave kanë thënë se sistemi i drejtësisë në Kosovë vazhdon të përballet me probleme të mëdha.

Ata kanë thënë se pavarësisht punës së bërë gjatë vitit 2016, nuk do të thotë se është bërë sa duhet për të kthyer besimin e duhur të qytetarëve në gjykata e prokurori