Ermira Mehmeti, largohet nga politika

Përmes një postimi në rrjetin social Facebook, Ermira Mehmeti thotë se nga dita e sotme i ka përfunduar mandati i deputetes dhe përfundimisht braktisë politikën

Dikur ishte zëri i partisë më të madhe shqiptare në Maqedoni, BDI, ndërsa nga sot ajo ka shpallur divorc të përhershme me këtë parti dhe me jetën politike. Ermira Mehmeti, ish-deputetja e BDI-së ka braktisur jetën politike duke deklaruar dorëheqje nga të gjjtiha pozitat politike që ka mbajtur deri më sot.

Ajo përmes një postimi në rrjetin social Facebook, ka bërë të ditur se nga dita e sotme i ka përfunduar mandati i deputetes dhe se përfundimisht braktisë politikën, shkruan INA, transmeton Albinfo.Ch.

“Dëshiroj t’ju informoj se sot përfundon mandati im si deputete në Parlamentin e Maqedonisë. Gjate tete viteve të kaluara kam qenë e nderuar dhe e obliguar që t’ju shërbejë juve dhe të punojë për zgjidhjen e problemeve dhe realizimin e kërkesave  tuaja. Sot përfundon ky rrugëtim përplot sfida dhe përgjegjësi për mua”, shkruan ajo.

“Dëshiroj të informoj opinionin po ashtu se duke filluar nga sot, publikisht dorëhiqem nga të gjitha funksionet e mia politike në Bashkimin Demokratik për Integrim”, shkruan Mehmeti.

Ajo thotë se nga dita e sotme, Ermira Mehmeti është vetëm një qytetare e lirë dhe nuk përfaqëson asnjë subjekt politik.

“T’ gjitha simbolet dhe ikonografia politike, duke filluar nga sot dhe në ditët në vijim, do të hiqen nga faqja ime zyrtare dhe nga faqja e fansave në facebook”, theksoi Mehmeti, e cila ka më shumë se një vit që kishte shprehur pakënaqësi me BDI-në, duke kërkuar reforma rrënjësore kuadrovike.