Viti i Majlindës

Albinfo.ch ju sjell të gjitha sukseset në sportin e Kosovës gjatë vitit 2016, duke veçuar futbollin, por edhe sukseset e xhudistes Majlinda Kelmendi

Viti 2016, si asnjëherë më parë ka qenë i suksesshëm për sportin kosovar. Në këtë vit u thye barriera e izolimit, por edhe u arritën shumë suksese që do të mbahen mend.

Albinfo.ch ju sjell të gjitha sukseset në sportin e Kosovës gjatë vitit 2016, duke veçuar futbollin, por edhe sukseset e xhudistes Majlinda Kelmendi.

Federata e Futbollit e Kosovës u pranua në UEFA dhe FIFA në maj të vitit 2016 dhe Përfaqësuesja e Kosovës fitoi të drejtën për të luajtur në kualifikime. Kosova e filloi me barazim ndaj Finlandës, por më pas erdhën humbjet nga Kroacia, Turqia dhe Ukraina. Shumë futbollistë pranuan të luajnë për Kosovën dhe me ekipin e ri që ka mund të arrijë shumë në të ardhmen.

Padyshim se suksesi i takon xhudistes pejane, Majlinda Kelmendi. Kampionia e dyfishtë e botës dhe Evropës kishte edhe një ëndërr, që të fitojë medaljen olimpike dhe këtë e arriti Lojërat Olimpike në Rio të Brazilit, duke fituar medaljen e artë. Kjo ishte hera e parë që Kosova paraqitej në Lojëra Olimpike dhe medalja e parë. Majlinda shkroi historinë e sportit kosovar dhe emri i saj do të mbahet mend për një kohë të gjatë. Kelmendi për të mbyllur vitin e suksesshëm u zgjodh edhe xhudistja më e mirë e vitit 2016 nga Federata Ndërkombëtare e Xhudos.

Në vitin 2016, edhe Përfaqësuesja e basketbollit u paraqit në kualifikime, por pësoi gjashtë humbje në gjashtë ndeshje. Hendbolli arriti barazimin e parë në ndeshjet ndërkombëtare ndaj Turqisë, kurse volejbolli u paraqit me kategori të reja.

Suksese kishte edhe në disa sporte tjera. Karateisti Herolind Nishevci fitoi medaljen e bronztë në Kampionatin Botëror, apo i treti në botë. Boksierja Donjeta Sadiku u shpall kampione e Evropës për juniore, kurse Distria Krasniqi në xhudo për juniore.