Gruevski e Ahmeti, takimi i parë paszgjedhor

Të dy partitë, VMRO-DPMNE dhe BDI, nuk kanë mohuar as opsionin e zgjedhjeve të reja, në rast të dështimit të gjetjes së një zgjidhje

Edhe pse apriori kishte kundërshtuar platformën e partive shqiptare për koalicion  qeverisës, mandatari për qeverinë e re në Maqedoni, Nikolla Gruevski i VMRO DPMNE-së, ka takuar liderin e BDI-së, Ali Ahmeti. Me këtë të fundit kanë biseduar për zhvillimet e fundit në këtë shtet, por edhe për modalitetet e mundshme për koalicion.

Siç raportojnë mediet në Shkup, Gruevski ka marrë autorizimin e komitetit ekzekutiv të partisë së tij për të kryesuar vetë negociatat për koalicion. Ndërsa nga partia e Ahmetit akoma nuk bëjnë të ditur nëse një vendim i tillë është marrë edhe nga BDI që do të nënkuptonte se liderët do të zhvillonin personalisht takimet.

BDI-ja kërkon përdorim të barabartë të gjuhës shqipe në të gjithë territorin, zgjatje të mandatit të Prokurorisë Speciale dhe vazhdimin e procesit të euro-integrimeve.

VMRO-DPMNE nuk pranon ndryshim të Kushtetutës sa i takon statusit të shqipes dhe as zgjatje të mandatit të Speciales, e cila sipas tyre ka anshmëri politike. Të dy partitë, VMRO-DPMNE dhe BDI kanë bërë me dije se negociatat mund të mos sjellin rezultate pozitive, citon AlsatM.

Të dy palët, ndërkaq nuk kanë mohuar as opsionin e zgjedhjeve të reja, në rast të dështimit të gjetjes së një zgjidhje.