Maltretimet e gazetarëve në Shqipëri

Vonesat në paga, mosdhënia e tyre, kontratat e njëanshme, liria e kufizuar, janë disa nga problemet me të cilat ballafaqohen gazetarët në Shqipëri

Gazetarët në Shqipëri kanë pak liri në punën e tyre, derisa ballafaqohen me shumë probleme, madje edhe esenciale si vonesa e pagave ose mosdhënia e tyre. Por, edhe kontratat nuk janë kolektive dhe bëhen sipas dëshirës së pronarëve, shkruan “DW”.

Unioni i Gazetarëve në Shqipëri është i shqetësuar për këtë fakt, megjithatë, nuk mund të bëjë shumë. “Çdo vit e përjetojnë këtë rreth 90% e gazetarëve. Kjo vonesë kap 1-3 muaj. 75 % e mediave e përsërisin këtë rregullisht. Ndërkohë që bosët e mediave nuk japin sqarime zyrtare për këtë, ata përpiqen të justifikohen verbalist”, thotë Aleksandër Çipa për “Deutschen Wellen”, përcjell albinfo.ch.

Por, gazetarët shqiptarë duhet të durojnë shumë, pasi rrezikojnë të humbasin vendin e tyre të punës. Frika nga humbja e vendit të punës është më e madhe se ngritja e zërit kundër bosëve të mediave. Gazetarët dhe kameramanët e televizionit “A1news” kishin lënë punën në shenjë proteste, duke kërkuar rrogat mujore. Por, ky televizion është mbyllur, derisa gazetarët nuk i kanë marrë paratë e tyre.

As orët shtesë nuk paguhen. Janë të pakta media në Shqipëri që e bëjnë këtë. Në Shqipëri mund të pushosh nga puna një gazetar dhe askush nuk jep llogari, derisa shumica e kontratave janë të njëanshme.